| 【明報專訊】寫呢段新聞，Emily終於知道乜嘢叫做「一字一淚」。 話說老總噚日行過我身邊，放低一個「大信封」，我當堂嚇咗一跳，以為自己平日寫嘢太放肆、又冇謹記上司教誨，老總要下「格殺令」。誰不知我打開信封一睇，先發現係香港記者協會嘅來信。原來記協最近做咗個調查，訪問記者行家嘅工作生活，雖然唔少行家今年有得加薪，但仍然有三成二人表示會喺兩年之內離開新聞界，另外三成人話會喺3至6年內轉行，原因好簡單，都係因為人工低(50.3％)、工作壓力(31.6％)同影響家庭生活(30.7％)。 除咗上述3個原因，工作條件相信亦都係重要因素。七成以上嘅資深行家(工作10年以上)話，現在嘅工作條件比10年前差咗，主要原因就係人手不足，同公司遇到缺人時選擇用「廉價童工」(即年輕新手)頂替，六成受訪者仲話好擔心新聞質素會因此下降。 雖然Emily無份填問卷，但睇到個調查結果都真係感同身受。記協今次真係有心，直接將個報告寄畀老總，唔知老總睇完之後，只會當係一則普通新聞，抑或會知道係一個行業警號呢？ =========================================================================== 原來我都係廉價童工… |
| |
